Landsþing Frjálslynda-flokksins hefst í dag. Það verður fróðlegt að sjá hvernig kosningar þar fara. Ég skoðaði vefsíðu flokksins og langaði að sjá hverjir verða í framboði í hvaða embætti, en það var ekki í boði. Ég sá að vísu að a.m.k. 2 frambjóðendur eru í embætti ritara flokksins. Báðir eru þeir kvenkyns, en mér hefur einmitt fundist vera svolítill karlrembubragur á flokknum undanfarið. Ef ég man rétt, þá eru 3 karlar á þingi fyrir flokkinn. Ein kona hefur reynt af alvöru að ná einhverjum frama fyrir flokkinn og þá virðist sem henni sé ýtt útí horn og ekki ólíklegt að það verði banamein flokksins. Mér finnst líklegt að flokkurinn klofni, hvernig sem kosningar um helgina fara. Þetta er ekki líklegt til árangurs. Ekki frekar en að það sé líklegt til árangurs að tveir hópar bjóði fram með einungis hagsmuni aldraðra og öryrkja að leiðarljósi.

Talandi um það, þá sá ég (með öðru auganu) fulltrúa þessarra tveggja hópa í kastljósi. Ég hjó eftir því að Helgi Seljan reyndi að halda aftur af framboðsræðum viðmælendanna, en hann þurfti ítrekað að grípa frammí fyrir þeim og stoppa þau af í þvælunni. Þau áttu mjög erfitt með að svara einföldum spurningum á einfaldan hátt. Nema eitt sinn, þegar konan (sem ég man ekki hvað heitir) var spurð hvaða áherslur hópurinn hefði í öðrum málefnum. Þá kom einfalt svar; “við styðjum öll framfaramál”. Ha? Hvað í ósköpunum þýðir það (ég sá að Helgi Seljan hugsaði á svipuðum nótum). Er virkilega til það stjórnmálaafl sem segir “við erum algjörlega á móti öllum framfaramálum”? Ekki einusinni Vinstri Grænir láta slíka vitleysu útúr sér þó þeir hafi orð á sér að vera á móti öllu. Ég held að þetta ágæta fólk átti sig ekki á því að það er verið að fjalla um fleiri mál en þau sem snúa að hópnum sem þau tilheyra. Ég veit ekki hvað í ósköpunum þau gera ef þau komast á þing og þurfa að greiða atkvæði um t.d. evrópuaðild, sjávarútvegsmál, vatnalög, stóriðjumál, fjárlög eða hvað sem er annað. Það virkar ekki að ypta bara öxlum við öllum málum sem snúa ekki beinlínis að öryrkjum og öldruðum. Það má ekki skilja það sem svo að mér sé sama um öryrkja og aldraða, síður en svo. Ég vona að ég verði aldrei svo óheppinn að verða öryrki, en ég vona svo sannarlega að ég verði aldraður. Þessi mál snerta alla og allir ættu að hafa skoðanir um þessi mál. Það er bara allt annar handleggur. Mér hefði fundist nær að þessi samtök eða hópar væru þrýstihópar, frekar en framboð. Það eina sem kemur útúr þessu er að þau koma til með að fiska atkvæði frá vinstri-flokkunum, sem kemur svo í bakið á þeim því að Sjálfstæðisflokkurinn, sem hefur ítrekað svínað á þeim, verður fyrir vikið enn frekar með afgerandi stöðu eftir kosningar eins og svo oft áður.

Jæja, búinn að blása nóg í bili. Ég vona bara að íslenska handboltalandsliðið klofni ekki.

Áfram Ísland!

kv.
E.

Ég vil endilega benda pólitískt þenkjandi fólki á pistil Guðmundar Steingrímssonar um “atvinnumiðlun” framsóknarflokksins. Sjá hér. Annað sjónarmið á sama máli má finna á bloggsíðu Björns Bjarnasonar, smelltu hér og flettu niður að Miðvikudegi, 13.12.06.

Mér finnst alltaf merkilegt þegar fólk beitir nýrri tækni í að leggja út gildrur fyrir kjósendur. Mér finnst jafn sorglegt þegar það er svo augjóslega verið að fiska eftir atkvæðum. Nýjasta tæknin sem menn hafa verið að beita uppá síðkastið er uppgerðar samúð og auðmýkt. Ég man að fyrir prófkjör samfylkingarinnar fyrir síðustu borgarstjórnarkosningar, sagði Stefán Jón eitthvað í þessum dúr: “við verðum bara að horfast í augu við það… við klúðruðum því algerlega”. Um daginn sagði nýji formaður framsóknar, nýjasti iðnaðarráðherrann, Jón Sigurðsson að stuðningurinn við íraksstríðið hafi verið rangur eða mistök. Svo talaði Ingibjörg Sólrún formaður samfylkingarinnar um að umfram allt þyrftu frambjóðendur og flokkar að vera heiðarlegir, annað kæmi í bakið á þeim. Ég hef nú grun um að hún sé þarna að reyna að veiða atkvæðin sem hrökkva af Sjálfstæðisflokknum v. Árna Johnsens. Að vísu er ekki loku fyrir það skotið að hún tali af reynslu, þar sem hún kom ekki heiðarlega fram þegar hún sveik loforð um veru sína í borgarsjórastólnum forðum. Það kom í bakið á henni í næstu alþingiskosningum á eftir. Frjálslyndir berjast innbyrðis og eiga eftir að flagga sínum afsökunum. Þeir hentu út atkvæðagildrum sem litu út einsog fordómar. Ég hef ekki kynnt mér þessi mál og ætla ekki að dæma um hvort raunverulegir fordómar hafi verið á ferðinni frekar en illa framreitt mál. Sjálfstæðisflokkurinn er ekki kominn með “auðmýktina” í sín útspil, en hver veit nema maður eigi eftir að sjá það gerast. Að vísu halda þeir því enn fram að það hafi verið rétt að lýsa yfir stuðningi við innrásina í Írak án þess að um það væri nokkurt samráð. Ég er farinn að halda að Valhöll sé innréttuð með speglum. Þeir sjá voðalega fátt annað en sjálfa sig finnst mér stundum. Það hefur farið lítið fyrir vinstri-grænum í þessu öllu saman.
Sjáum hvað setur.

kv.
E

Það er greinilegt að kosningar eru að nálgast. Formaður Framsóknarflokksins er byrjaður í atkvæðaveiðum og nær eflaust að ná brottflúnum frömmurunum sem yfirgáfu skútuna eftir að Dóri og Dabbi lýstu yfir stríði við Írak. Hann (formaðurinn, Jón Sigurðsson) lýsti því yfir að mistök hafi verið gerð með stríðsstuðningsyfirlýsingunni, en baðst ekki afsökunar. Valgerður Sverrisdóttir baðst afsökunar á því að vatnsskemdir hafi orðið á nokkrum húsum “vallarins” fyrir skömmu. Ég er farinn að fá á tilfinninguna að Framsóknarfólkið hafi fengið ráðgjafa frá auglýsingastofu um það hvernig best er að hysja upp um sig buxurnar og ná til baka fylginu sem það hefur tapað (og helst gott betur). Ég er ekki alveg sannfærður. Mér finnst hugur ekki fylgja máli. Mér finnst þessi flokkur (sem mælist ekki með mikið fylgi, en er þó bæði í ríkisstjórn og borgarstjórn) ekki eiga skilið að stýra þjóðarskútunni. Þeir eru allavega ekki fulltrúar meirihluta þjóðarinnar. Svo er það nú annað, fyrst ég var að minnast á borgarstjórnina, hvernig má það vera að flokkur sem fékk ca 5% fylgi í kosningum, stýrir helmingi allra ráða á vegum borgarinnar? Ég heyrði um daginn þeir væru með 4 formenn í 8 ráðum. Þar af formann borgarráðs (sem er næstráðandi í borginni skilst mér). Ég skil ekki hvernig þetta getur kallast lýðræði. 95% Reykvíkinga vildu ekki hafa Framsókn við stjórnvölinn, en þeir eru þar samt. Ég hlýt að hafa misskilið eitthvað í þessum málum.

Well, nóg nöldur í bili. Hafið það gott og veriði sæl
kv.
E

ps. Ég held reyndar að þessi “auðmýkt” forystufólks framsóknarflokksins virki og fylgið aukist.