Nú er stund milli stríða í hátíðahöldunum og áramótin eru handan við hornið. Þessir dagar (og fyrstu dagarnir á nýju ári) ættu að vera frídagar líka, svo hægt sé að borða afgangana eftir veislurnar. Kannist þið ekki við þetta, að jólasteikin var rífleg (nema hjá þeim sem voru með rjúpu) og hangikjötið líka. Þeytingur milli veisluhalda í öðrum húsum gerir það að verkum að ekki gefst mikill tími til að borða allan afganginn sem til er á heimilum landsins og að auki fær fólk fljótt leið á kræsingunum og fiskbúðir landsins fyllast af fólki sem þráir ekkert heitar en að fá bara venjulega gamaldags ýsu til að sjóða.

Nú eru bara nokkrir dagar eftir af árinu. Ég vona að okkur takist að klára það án þess að fleiri banaslys verði í umferðinni. Þetta er búið að vera ótrúlegt ár hvað það varðar. 30 látnir á 12 mánuðum. Meðal talið er þá 2-3 á mánuði. Það er allt, allt of mikið.

Það er nú eitt sem ég vil minnast á varðandi umferðina hérna á höfuðborgarsvæðinu. Það eru hraðatakmarkanir. Ég skil ekki hvernig er hægt að ætlast til þess að fólk taki mark á hraðatakmörkunum á aðal-umferðaræðum svæðisins. Tökum sem dæmi Sæbraut/Reykjanesbraut (t.d. að Vífilsstöðum). Á sumum köflum er hámarkshraði 70 en öðrum 60. Hvers vegna í ósköpunum er þetta svona? Ég get ekki betur séð en að þetta sé einungis til þess fallið að gera fólk að lögbrjótum. Prófið bara að keyra eftir þessu. Keyrið á 70 og bremsið svo við 60 skilti og sjáið hvað gerist. Ég tek ekki ábyrgð á tjóninu. Þegar fólki er nánast gert ómögulegt að vera löghlýðið, þá hættir því til að taka minna mark á þessum skiltum. Flestir keyra svo hratt á þessum svæðum að þeir sjá skiltin ekki hvort eð er. Ég keyri þessa leið nánast daglega og mér sýnist vera meiri hætta fólgin í að keyra löglega heldur en að keyra ólöglega. Í þessu tilviki er nánast hægt að segja að lögin séu hættuleg eða skapi í það minnsta hættu. Ég vona að ég komist heill heim á eftir. Ég ætla að keyra á ólöglegum hraða til þess að auka líkurnar á að það takist.

kv.
E

Ég mæli með því að þeir sem ætla að fá sér að borða hádegismat á höfuðborgarsvæðinu, skelli sér á Fylgifiska (Suðurlandsbraut 10). Ég villist þangað annað slagið og hef aldrei fengið slæman mat, þvert á móti, alltaf góðan mat. Ég ætla ekki að reyna að lýsa þessu neitt frekar, þið þurfið bara að upplifa þetta sjálf.